Рускиот министер за надворешни работи Сергеј Лавров денеска изјави дека руската и американската делегација на разговорите во Ријад „не само што се слушале туку и дека се чуле“ и најави претстојно отворање на амбасади во двете земји.
Лавров на прес-конференција по средбата рече дека двете страни се согласиле да обезбедат „најбрзо можно“ именување на амбасадори во двете земји и отстранување на бариерите што американската администрација, особено онаа на поранешниот претседател Џо Бајден, ги поставуваше меѓу дипломатските претставништва долги години.
Тој додаде дека меѓусебното присуство на амбасадите е „практично договорено“, што значи дека двете страни се согласиле дека треба да ги решат прашањата за функционирањето на дипломатските претставништва.
Лавров ги оцени разговорите меѓу двете делегации како „многу корисни“.
„Јас ги имам сите причини да верувам дека американската страна ја разбира нашата позиција“, вели тој.
Лавров нагласи дека двете страни се договориле „што е можно поскоро“ да го започнат процесот на мировни преговори за Украина.
Тој изјави дека Русија ќе чека САД да ги потврдат своите претставници за преговорите, а потоа ќе назначат свои.
Лавров потврди дека точките за кои е договорено вклучуваат „создавање услови“ за поширока американско-руска соработка, вклучително и продолжување на консултациите за геополитички прашања, како и отстранување на вештачките бариери за заемно корисна економска соработка.
Тој исто така посочи дека постои „заедничка желба“ да се најдат решенија за војната во Украина.
Лавров рече дека ги информирал своите американски колеги дека испраќањето странски контингент од земјите на НАТО во Украина е неприфатливо за Русија, пренесе РИА Новости.
„Појавувањето на вооружените сили од истите земји на НАТО, но под странско знаме, под знамето на Европската унија или под национални знамиња, не менува ништо во овој поглед. Ова, се разбира, за нас е неприфатливо“, рече Лавров.
Тој рече дека претставниците на САД во Ријад предложиле мораториум на нападите врз енергетската инфраструктура на Русија и Украина.
Лавров навести дека Русија го отфрлила предлогот, повторувајќи дека нејзините вооружени сили ги имаат само на нишан објектите кои ѝ служат на војската на Украина.
Тој рече дека за сличен мораториум се разговарало минатата година за време на преговорите за продолжување на договорот за жито во Црното Море, но Киев одбил да се вклучи во дијалогот.
