Русија тврди дека САД бараат провокација за ескалација на своите конфронтирачки пристапи.
„Тие целосно го занемаруваат фактот дека по почетокот на специјалната воена операција нашата војска релевантните подрачја на Црно Море, на некои места покрај брегот, ги прогласи за подрачја што имаат ограничен статус за користење на кој било авион“, рече синоќа рускиот министер за надворешни работи Сергеј Лавров во интервју за телевизискиот канал „Росија-24“.
Лавров тврди дека непознавањето на тој факт од Вашингтон сугерира дека Америка постојано се обидува да бара некаков вид провокација за ескалација на своите конфронтирачки пристапи.
„Тоа е лошо бидејќи постојано изјавуваат дека се одговорна сила заинтересирана за стратегиска стабилност. Инаку, ова ми го рече државниот секретар Блинкен за време на состанокот во Индија. Но зборовите не се совпаѓаат со делата“, рече Лавров.
Според неговите зборови, секој инцидент што ќе предизвика судир помеѓу две големи сили секогаш претставува многу сериозен ризик за глобалната безбедност.
Претходно Пентагон објави дека руски борбен авион „SU-27“ удрил во американскиот дрон „Reaper“ во меѓународниот воздушен простор над Црно Море, предизвикувајќи паѓање на американското летало.
Како што наведе Пентагон, инцидентот се случил откако два руски авиона „SU-27“ извеле небезбедно и непрофесионално пресретнување на „Reaper“, вклучително и истурање гориво врз дронот и летање пред него „на непромислен, еколошки неисправен и непрофесионален начин“.
Во соопштението на Пентагон се додава дека дронот вршел извидување кога еден од авионите „SU-27“ удрил во елисата на „MQ-9 Reaper“, што ги навело операторите на дронот да го соборат леталото во меѓународните води на Црно Море.
Рускиот амбасадор во САД, Анатолиј Антонов, рече дека дронот се обидел да собере информации што би ѝ ги пренел на Украина за напади врз Русија.
Во вторникот Русија демантираше дека нејзини борбени авиони имале контакт со американскиот воен дрон, за кој Вашингтон ја обвини Москва дека го соборила.
