Шефовите на држави упатија пригодни честитки до турскиот претседател Реџеп Таип Ердоган по изборите одржани во Туркије.
Претседателот на Азербејџан Илхам Алиев во телефонски разговор им честиташе на Ердоган и на Народната алијанса за освоеното мнозинство гласови на претседателските и парламентарните избори одржани во неделата.
Алиев истакна дека Туркије под водство на Ердоган доживеала голем напредок, додавајќи дека токму поради тоа турскиот народ и на овие избори ја покажал својата доверба во својот лидер. Во разговорот двајцата лидери ја повторија важноста на пријателските и братските односи меѓу двете земји.
На Ердоган му честиташе и претседателот на Узбекистан Шавкат Мирзијоев.
Како што соопштија од кабинетот на претседателот на Узбекистан, Мирзијоев во телефонски разговор му честитал на Ердоган за успехот на претседателските и парламентарните избори.
Мирзијоев посочи дека изборните резултати укажуваат на широката поддршка на народот на Туркије за политичките промени и економските реформи постигнати под водство на Ердоган.
Двајцата лидери разговараа и за зајакнување на стратешкото партнерство меѓу Узбекистан и Туркије.
Претседателот на Врховната изборна комисија на Туркије (YSK) Ахмет Јенер рече дека, според податоците собрани до 9:45 часот по локално време (08:45 часот по средноевропско време), актуелниот турски претседател Реџеп Таип Ердоган освоил 49,40 отсто, а кандидатот на опозицијата Кемал Киличдароглу 44,96 отсто од гласовите.
Јенер во своето обраќање пред новинарите ги претстави најновите податоци за резултатите од претседателските и парламентарните избори одржани во неделата.
„Од вкупно 192.214 гласачки кутии во земјава, до 9.45 часот се отворени 192.187, што е околу 99 отсто. Во моментов во земјава не се отворени 27 гласачки кутии. Од 9.594 гласачки кутии во странство отворени се 8.065 или 84,06 отсто од гласачките кутии“, рече Јенер и додаде:
„Според овие податоци, до 9 часот и 45 минути Реџеп Таип Ердоган освоил 49,40 отсто од гласовите, Кемал Киличдароглу 44,96 отсто, Синан Оган 5,2 отсто, а Мухарем Инџе 0,44 отсто.
Граѓаните на Туркије во неделата гласаа на редовните претседателски и парламентарни избори, избирајќи меѓу тројца претседателски кандидати и 24 политички партии и 151 независен кандидат за новото Големо национално собрание, кое има вкупно 600 пратенички места.
