Израелската војска наводно уништила „активен истражувачки капацитет за нуклеарно оружје во Иран“ во нападот минатиот месец, објавија израелските медиуми.
Информативниот портал „Вала“ објави ново тврдење во врска со нападот на Израел врз Иран на 26 октомври.
Во веста, заснована на неименувани американски и израелски претставници, се тврди дека целта на нападот на Тел Авив бил „таен објект“ во регионот Парчин, во близина на Техеран, кој „Иран наводно го користи за истражување на нуклеарно оружје“.
Наведено е дека во нападот во објектот наречен „Талеган 2“ била уништена напредна опрема што се користи во дизајнот на пластичните експлозиви што го опкружуваат ураниумот во нуклеарна направа и се потребни за негово активирање.
Иако во текстот се наведува дека Иран има таен објект за истражување на нуклеарно оружје, администрацијата на Техеран цврсто го негира тврдењето за производство на нуклеарно оружје.
Иранскиот претседател Масуд Пезешкијан во вчерашната изјава рече дека неговата земја на никаков начин не се обидува да произведе нуклеарно оружје во согласност со фатвата на лидерот на земјата, ајатолахот Али Хамнеи и дека нема да дозволи некој да отстапи од таа политика.
