Италијанската премиерка Џорџа Мелони денес го поздрави објавувањето на прекинот на огнот меѓу Израел и Либан како „многу важен развој“, но истакна дека тоа треба да се смета само како „почетна точка“, јавува Анадолу.
Мелони, говорејќи пред лидерите од целиот Медитеран на конференцијата во Рим, ги повика да ја „искористат можноста“ од прекинот на огнот помеѓу Израел и Либан за да работат на долгорочна стабилизација на регионот.
„Мора да ја искористиме оваа можност и да работиме со убедување за да ја стабилизираме израелско-либанската граница, а тоа ќе им овозможи на сите раселени луѓе, Израелци и Либанци, безбедно да се вратат во своите домови“, рече Мелони.
Италијанската премиерка, исто така, истакна дека е од суштинско значење „целосно имплементирање на Резолуцијата 1701 на ОН“ со зајакнување на мировната мисија УНИФИЛ во Јужен Либан, „особено со зајакнување на капацитетите на либанските вооружени сили“.
Мелони истакна дека Рим ќе биде горд што ќе работи со Г-7, земјите од Заливот (Персискиот) и европските партнери, за зајакнување на капацитетот на либанската армија „за да можат да ги преземат одговорностите предвидени со мандатот на ОН“.
„Ова е суштински услов за постигнување на целите предвидени со самиот прекин на огнот и со резолуциите на ОН“, додаде Мелони.
Договорот за прекин на огнот објавен вчера може да стави крај на над една година прекугранични судири меѓу Израел и либанската група Хезболах. Прекинот на огнот што започна во раните утрински часови денес ги зголеми надежите во регионот зафатен од војна.
