Палестинскиот премиер Мухамед Мустафа изјави дека чекорот кој го направија Шпанија, Ирска и Норвешка за признавање на палестинската држава е важен и дека наскоро очекуваат нов бран признавања.
Мустафа даде заедничка изјава за медиумите по средбата со шпанскиот министер за надворешни работи Хозе Мануел Албарес во Брисел, главниот град на Белгија.
Тој истакна дека воспоставувањето на палестинска држава е единствениот начин да се осигураат мирот и правдата во регионот и рече: „Го поздравуваме чекорот на Шпанија кон признавањето на палестинската држава.“
Повикувајќи ги останатите земји да преземат сличен чекор што е можно поскоро, Мустафа додаде: „Чекорот на Шпанија, Ирска и Норвешка е важен и очекуваме нов бран на признавања на палестинската држава во блиска иднина.“
Укажувајќи на огромната хуманитарна катастрофа во Појасот Газа, палестинскиот премиер рече: „Ќе работиме на поддршка на нашиот народ во Појасот Газа и да го ставиме под чадорот на палестинската администрација.“
Шпанија, Норвешка и Ирска најавија дека на 28 мај ќе ја признаат Палестина со границите од 1967 година, во согласност со меѓународното право и релевантните резолуции на Советот за безбедност на Обединетите нации (СБОН).