Началниците на Генералштабовите на Русија и САД, Валери Герасимов и Чарлс Браун, одржаа телефонски разговор, изјави портпаролот на Браун, капетанот Џеј Ди Дорси, наведувајќи дека темите биле глобалната и регионалната безбедност, вклучително и актуелниот конфликт во Украина.
„Началникот на Здружениот Генералштаб на вооружените сили на САД Чарлс Браун телефонски разговараше со началникот на рускиот Генералштаб Валериј Герасимов на 27 ноември на барање на руското Министерство за одбрана“, прецизира Дорси за Еј-Би-Си Њуз.
Според него, ова бил прв контакт меѓу воените лидери на двете земји по назначувањето на Браун за началник на Генералштабот на вооружените сили на САД.
Портпаролот на Пентагон во соопштението рече дека страните разговарале за „бројни глобални и регионални безбедносни прашања, вклучувајќи го и тековниот конфликт во Украина“.
Герасимов и Браун разговарале и за тоа како да се избегне погрешна проценка и ескалација меѓу двете земји кога станува збор за Украина, рече американскиот функционер.
Конкретно, тие разговарале за дозволата на САД за Украина да користи ракети со долг дострел АТАЦМС против цели во Русија, како и за тестирањето на руската балистичка ракета со среден дострел ИРБМ на цели во Украина.
Според Дорси, генералот Браун се согласил да не ги објавува деталите од разговорот.
Највисокиот руски генерал минатата недела упати ненајавен повик до својот американски колега за да ги предупреди САД дека Русија ќе изврши пробно лансирање на хиперсонични ракети во источниот дел на Средоземното Море и дека бродовите на американската морнарица треба да се држат подалеку од целната област од безбедносни причини, пренесува Еј-Би-Си Њуз, повикувајќи се на американски официјални лица.
Тестирањето на руската хиперсонична ракета се одржа во источниот дел на Средоземното Море, област каде што американската морнарица има три амфибиски бродови со 2.200 маринци, како и уништувачи кои обезбедуваат противракетна одбрана за Израел, наведува американскиот сајт за вести.
