Над 1.000 научници низ светот, главно од областа на психологијата и неврологијата, потпишаа отворено писмо во кое бараат прекин на огнот во Газа, како и меѓународната заедница да изврши притисок врз Израел да го почитува меѓународното хуманитарно право, јави шпанската новинска агенција ЕФЕ.
Меѓу потписниците се и нобеловците Меј-Брит Мозер и Едвард Мозер од Норвешка, и Сусуму Тонегава од Јапонија.
Неколку шпански истражувачи, меѓу кои и Пабло Ланиљос, член на групата Невровештачка интелигенција и роботика од Институтот Кахал, исто така го потпишаа писмото.
„Овој апел е моќен бидејќи доаѓа од научници од неврологијата - луѓе кои проучуваат како мозокот ги перцепира и обработува таквите конфликти“, изјави Ланиљос за ЕФЕ.
Во писмото се вели дека се осудува насилството извршено од сите страни, вклучително и нападите на Хамас на 7 октомври 2023 година, држењето заложници и „безбројните воени злосторства“ извршени од Израел, во кои се убиени повеќе од 48.000 луѓе во Газа од почетокот на конфликтот пред две години.
Без меѓународен притисок, екстремистите на власт се чувствуваат охрабрени да ги реализираат своите смртоносни намери, овековечувајќи омраза и насилство, се предупредува во писмото.
Научниците нагласуваат дека регионот е заробен во деструктивен циклус на насилство и одмазда што ја поткопува можноста за мирен соживот, додавајќи дека надвладуваат и преовладуваат „омразата, смртта и уништувањето“.
Во писмото се вели дека човечката психологија често ги преувеличува разликите меѓу групите во конфликт, но исто така укажува на универзален капацитет за емпатија и соработка.
Научниците ја повикаа меѓународната заедница да изврши притисок врз Израел да ја прекине војната, и преку стопирање на продажбата на оружје или преиспитување на договорите за соработка.
„Ние не сме против израелскиот народ“, се вели во писмото. „Ние сме за сите народи - Израелци, Палестинци и Либанци.“
„Актуелната политика на Израел“, тврдат тие, „им нанесе непоправлива штета на Палестинците и ја загрози безбедноста на сопствениот народ.“
Писмото го иницираа истражувачи од Универзитетот Сорбона во Франција и Принстон во САД.
