Во израелските воздушни напади во Газа во петокот загинаа најмалку 12 Палестинци, а неколку други се повредени, информираа палестинската Цивилна одбрана и медицински извори.
Палестинската цивилна одбрана соопшти дека нејзините тимови извлекле тела на три жртви и спасиле пет повредени лица од урнатините на куќата на семејството Насар во градот Газа.
Цивилната одбрана, исто така, објави дека во уште еден израелски напад врз дом во населбата Ал-Зајтун во Газа се повредени четири лица, кои се пренесени на лекување во Баптистичката болница.
Во градот Газа, според медицински извори, загинаа уште четворица Палестинци, а неколкумина се повредени во израелски напад врз група цивили во населбата Тал ал Хава.
Во централна Газа, израелските сили продолжија со силно бомбардирање на различни делови од бегалскиот камп Нусејрат втор ден по ред.
Болницата Ал-Авда во кампот Нусејрат извести дека нејзините тимови, заедно со единиците за цивилна одбрана, извлекле пет тела по израелски воздушен напад, чија цел била семејна куќа во кампот.
Медицински извор изјави за Анадолу изјавија дека осум Палестинци исто така се повредени кога израелски хеликоптер нападнал област западно од Деир ал Балах во центарот на Газа.
Изворот додаде дека пет Палестинци се повредени во израелски воздушен напад врз семејна куќа северно од бегалскиот камп Магази во центарот на Газа.
Израел започна геноцидна војна на Појасот Газа по прекуграничен напад на палестинската група Хамас во октомври минатата година, при што загинаа над 44.300 луѓе, повеќето жени и деца, а беа повредени над 104.900.
Минатата недела Меѓународниот кривичен суд (МКС) издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со тужба за геноцид пред Меѓународниот суд на правдата за неговата смртоносна војна против Газа.
