Во израелските воздушни напади и копнени операции во Појасот Газа од 7 октомври досега загинаа 13.430 деца, објави во понеделник Канцеларијата за медиуми во Газа.
Од канцеларијата истакнуваат дека 8.900 жени биле убиени во текот на 150 дена, додавајќи дека 7.000 луѓе, од кои 70 отсто се жени и деца, сè уште се под урнатините или исчезнати.
Канцеларијата за медиуми соопшти дека во тој период животот го загубиле 364 здравствени работници и 132 новинари.
Предупредувајќи на растечкиот глад во Газа, канцеларијата соопшти дека Израел го блокирал влезот на храна и залихи со помош, па дури и ги таргетирал возилата со хуманитарна помош кои се обидувале да стигнат до регионот, предизвикувајќи смрт на десетици луѓе кои барале храна за своите семејства.
Израел започна смртоносна офанзива на Појасот Газа откако Хамас го нападна Израел на 7 октомври, при што загинаа најмалку 30.534 луѓе, а беа повредени 71.920.
На 26 јануари, Меѓународниот суд на правдата пресуди дека Израел мора да се воздржи од какви било активности поврзани со убивање, напад и уништување на жителите на Појасот Газа и да ги преземе сите мерки за да го спречи геноцидот, по тужбата за геноцид поднесена од Јужноафриканската Република. .
Сепак, нападите продолжуваат со несмалено темпо, а испораката на помош останува недоволна за справување со хуманитарната катастрофа.
