Најмалку четири лица загинаа, а седум лица се повредени во вооружен напад на училиште во американската сојузна држава Висконсин.
Според полицијата, нападот бил извршен во утринските часови во христијанското училиште Абндант Лајф во Медисон, главниот град на Висконсин, каде има градинка и настава до 12 одделение.
Шефот на полицијата во Медисон, Шон Барнс, изјави дека четири лица загинале, а најмалку седум други се повредени.
Истакнувајќи дека осомничениот за нападот бил ученик во училиштето и дека полицијата го пронашла мртов внатре во училиштето, Барнс нагласи дека полицијата не пукала од оружјето кога интервенирала.
Полицијата презеде опсежни безбедносни мерки во областа и затвори многу патишта за сообраќај.
Во ова основно училиште учат околу 390 ученици.
Белата куќа соопшти дека за овој инцидент бил информиран и американскиот претседател Џо Бајден.
„Високи претставници на Белата куќа се во контакт со локалните колеги во Медисон за да обезбедат поддршка по потреба“, рече заменик-секретарот за печат Емили Сајмонс во соопштението.
Во изминатите години, САД станаа озлогласени по редовните смртоносни престрелки во училиштата, од кои некои земаа десетици жртви, при што многу членови на јавноста го осудуваат недостатокот на построга контрола на оружјето за да се спречи повеќе деца да умираат.
