Вториот ден од состанокот меѓу министрите за одбрана на НАТО продолжи денес со дискусии за ситуацијата во Израел и нејзините пошироки импликации за Блискиот Исток.
Говорејќи за новинарите пред состанокот во седиштето на НАТО во Брисел, генералниот секретар Јенс Столтенберг рече дека министрите за одбрана ќе се осврнат на „широк спектар на прашања“, вклучително и поддршката за Украина и иднината на мисиите на Алијансата во Косово и Ирак.
Тој додаде дека израелскиот министер за одбрана Јоав Галант ќе ги информира присутните за нападите на палестинската група Хамас на Израел во текот на викендот.
Американскиот секретар за одбрана Лојд Остин рече дека Вашингтон ја дели „огорченоста од терористичкиот напад врз Израел од страна на Хамас“ и ја потврди „решителноста на Вашингтон да го поддржи правото на Израел да се брани“.
Исто така, тој истакна дека министрите за одбрана ќе продолжат со разговорите за зајакнување на одбраната на НАТО како продолжение на лидерскиот Самит одржан во јули.
На првиот ден од состанокот министрите на НАТО учествуваа на обединувањето на Советот НАТО-Украина и одбранбената Контакт група на Украина, блок од 54 земји кои обезбедуваат оружје за Украина.
На разговорите присуствуваше и украинскиот претседател Владимир Зеленски.
Во услови на драматична ескалација на тензиите на Блискиот Исток, израелските сили започнаа непрекината и силна воена кампања против Појасот Газа како одговор на воената офанзива на палестинската група Хамас на израелските територии.
Конфликтот започна кога Хамас ја иницираше операцијата „Поплава Ал Акса“ против Израел, ненадеен напад од повеќе страни - лансирање ракети и инфилтрирање во Израел преку копно, море и воздух, за што Хамас рече дека е одмазда за рациите во џамијата „Ал Акса“ во окупираниот Источен Кудс (Ерусалим) и зголеменото насилство на еврејските доселеници врз Палестинците.
Како одговор на акциите на Хамас, израелската војска ја започна операцијата „Железни мечеви“ против позиции на Хамас во Појасот Газа.
Одговорот на Израел се заостри и со прекинување на снабдувањето со вода и електрична енергија на Газа, дополнително влошувајќи ги условите за живот во областа што е под строга опсада од 2007 година.
