Израелскиот премиер Бенјамин Нетанјаху нареди засилена воена акција на окупираниот Западен Брег, соопшти неговиот Кабинет.
Наредбата е дадена по експлозиите што одекнаа во три празни автобуси на паркинзи во предградијата на Тел Авив - Бат Јам и Холон - синоќа, пренесоа израелските медиуми.
Според полициските извештаи цитирани од дневниот весник „Једиот Ахронот“, во инцидентите нема повредени лица.
Во соопштението на Кабинетот на израелскиот премиер се наведува: „По обидот за извршување синхронизирани бомбашки напади врз автобуси, премиерот Бенјамин Нетанјаху штотуку заврши безбедносна процена со министерот за одбрана, началникот на Генералштабот на ИДФ (Израелската армија), директорот на ИСА (Израелската безбедносна агенција) и генералниот инспектор на израелската полиција.“
Од Кабинетот додадоа дека Нетанјаху ја задолжил армијата „да спроведе интензивна операција против центрите на тероризам“ на Западниот Брег.
Оваа последна ескалација е дел од моделот на колективно казнување што го применува Израел со проширување на своите воени офанзиви низ палестинските територии. Израелската армија продолжи со смртоносните рации во северниот дел на Западниот Брег, каде што најмалку 60 лица загинаа, а илјадници беа раселени од минатиот месец досега.
Тензиите остануваат високи низ окупираниот Западен Брег, каде што најмалку 920 Палестинци се убиени, а речиси 7.000 се повредени во нападите на израелската армија и нелегалните доселеници од почетокот на војната во Газа на 7 октомври 2023 година, според палестинското Министерство за здравство.
Во јули Меѓународниот суд на правдата ја прогласи долгогодишната окупација на палестинските територии од страна на Израел за нелегална, повикувајќи на евакуација на сите населби на Западниот Брег и во Источен Ерусалим.
