Израелскиот премиер Бенјамин Нетанјаху во четвртокот ги осуди налозите за апсење на Меѓународниот кривичен суд (МКС) за него и неговиот поранешен министер за одбрана Јоав Галант како „антисемитски“.
„Израел со гадење ги отфрла апсурдните и измамнички дејствија на МКС“, соопшти неговиот кабинет, додавајќи дека Нетанјаху „нема да попушти под притисок“ во одбрана на израелските граѓани.
Израелските политичари и опозиционери го поддржаа Нетанјаху.
Израелскиот претседател Исак Херцог рече дека со одлуката МКС „ја избра страната на тероризмот и злото пред демократијата и слободата и го претвори меѓународниот правосуден систем во жив штит за злосторствата на Хамас против човештвото“.
„Срамната одлука на МКС ја претвори универзалната правда во универзален потсмев. Таа ја исмева жртвата на сите оние кои се борат за правда - од сојузничката победа над нацистите до денес“, рече Херцог.
Израел, како и САД, не е член на МКС, но Светскиот суд рече дека израелското прифаќање на неговата јурисдикција не е неопходно.
Обвинетите ќе бидат предмет на апсење доколку патуваат во некоја од повеќе од 120 земји кои се членки на МКС.
И министрите на израелската Влада и лидерите на опозицијата денес ги отфрлија налозите за приведување на Нетанјаху и Галант.
Министерот за надворешни работи Гидеон Саар ги нарече налозите за апсење на МКС „мрачен момент“, тврдејќи дека судот со седиште во Хаг „ја загубил сета легитимност за своето постоење и активности“.
Екстремно десничарскиот министер за национална безбедност Итамар Бен-Гвир ја означи судската одлука како „антисемитска“, велејќи дека одговорот на судот ќе биде преку „примена на суверенитет врз сите територии на Јудеја и Самарија (Западниот Брег).
Опозицискиот лидер Јаир Лапид остро ги критикуваше налозите за апсење на МКС за Нетанјаху и Галант, тврдејќи дека Израел „се брани себеси“ од, како што ги нарече, „терористичките организации“.
Поранешниот министер на воениот кабинет Бени Ганц ги опиша налозите за апсење како „морално слепило“.
