Израелскиот премиер Бенјамин Нетанјаху денеска изјави дека одлуката на главниот обвинител на Меѓународниот кривичен суд (МКС) Карим Кан да побара издавање налог за негово апсење е „нова форма на антисемитизам“, која, како што рече, „ се преселила од универзитите во Хаг“.
Тој посочи дека овој потег на МКС е „целосно искривување на реалноста“, пренесува „Тајмс оф Израел“.
Тој ѝ вети на израелската јавност дека „напорите на МКС да ни ги врзат рацете ќе пропаднат“ и дека ниту едно меѓународно тело нема да го спречи Израел „да ги удри оние што бараат наше уништување“.
Нетанјаху нагласи дека Израел, и покрај одлуката на Карим Кан, ќе го уништи Хамас и ќе постигне „целосна победа“.
Тој одлуката на обвинителот ја нарече „апсурдна“ и дека Израел е целта на таа одлука.
„Со гадење ја отфрлам споредбата меѓу демократски Израел и масовните убијци на Хамас што ја направи главниот обвинител на Хашкиот трибунал“, рече Нетанјаху.
Тој истакна дека не разбира како Кан го споредува „Хамас кој убиваше, палеше, колеше, обезглавуваше, силуваше и киднапираше нашите браќа и сестри со војниците на ИД кои водеа праведна војна“.
Главниот обвинител на МКС, Карим Кан, претходно денеска изјави дека се поднесени налози за апсење против Нетанјаху и министерот за одбрана Јоав Галант под обвинение за „предизвикување истребување, предизвикување глад како метод на војна, вклучително и одбивање хуманитарна помош и намерно таргетирање цивили во конфликтот“.
Освен тоа, денеска судот побара и апсење на лидерите на Хамас- Јахје Синвар, Мохамед Деиф и Исмаил Ханије.
Тројцата се обвинети за „истребување, убиство, земање заложници, силување и сексуален напад“.
