Израелскиот премиер Бенјамин Нетанјаху тврди дека израелскиот воздушен напад во саботата во областа Ал-Маваси во Појасот Газа бил насочен кон генералниот командант на Бригадите Ал-Касам и неговиот заменик.
„Операцијата Ал-Маваси беше насочена кон Мохамед Деиф и неговиот заменик Рафа Салама, но засега нема потврди за нивната смрт“, рече Нетанјаху за лидерите на военото крило на Хамас на прес-конференција во Тел Авив.
„Ќе дојдеме до секој одговорен за настаните од 7 октомври.”
Тој рече дека израелската агенција за домашна безбедност, Шин Бет, му ја претставила операцијата во Ал-Маваси, која тој ја одобрил.
Нетанјаху ги негираше обвинувањата на домашните и меѓународните набљудувачи дека се обидува да го попречи договорот за размена на заложници и прекин на огнот со палестинските фракции во Газа, но рече дека е „решен да обезбеди добар договор, според принципите што ги поставил“.
Во нападот во Ал Маваси во јужниот дел на Газа загинаа 90 Палестинци, а 300 беа повредени, соопшти Министерството за здравство на Газа.
Дневниот весник Израел Хајом, без да обезбеди докази, тврдеше дека главната цел на воздушниот напад била да се елиминира Деиф.
„Се проценува дека постои голема веројатност Деиф да е повреден во нападот, но воените претставници го чекаат исходот“, се додава.
Радио на израелската армија, исто така, тврди дека нападот бил насочен кон „важна личност“ во Хамас.
Но палестинската група на отпорот во соопштение рече дека тврдењата на израелските медиуми за нападот во јужниот дел на Газа се „неосновани“.
Се додава дека наводите на израелските медиуми „доаѓаат да ги прикријат размерите на ужасниот масакр што го изврши окупацијата“.
Израел, прекршувајќи ја резолуцијата на Советот за безбедност на ОН со која се бара итен прекин на огнот, се соочи со меѓународна осуда поради неговата континуирана брутална офанзива врз Газа од 7. октомври и нападот од Хамас.
Според локалните здравствени власти, оттогаш се убиени повеќе од 38.000 Палестинци, главно жени и деца, а над 88.000 се повредени.
Израел е обвинет за геноцид пред Меѓународниот суд на правдата, чија последна пресуда му наложи веднаш да ја прекине воената операција во јужниот град Рафах, каде што повеќе од 1 милион Палестинци побараа засолниште од војната пред да биде нападната на 6 мај.
