Израелскиот премиер Бенјамин Нетанјаху е загрижен дека Меѓународниот кривичен суд (МКС) може да издаде налог за негово и апсење на други високи израелски функционери, објавија медиумите во саботата.
„Нетанјаху беше неприродно исплашен и загрижен поради можноста да биде издаден налог за апсење од МКС во Хаг“, пишува весникот Марив, цитирајќи неименувани извори.
Според Марив, Нетанјаху во последните денови телефонски им се јавувал на меѓународните лидери и официјални лица, особено на американскиот претседател Џо Бајден, за да спречи издавање налог за апсење.
„Под мое водство, Израел никогаш нема да прифати каков било обид на МКС да го поткопа неговото вродено право на самоодбрана. Заканата да се заробат војници и службеници на единствената блискоисточна демократија и единствената еврејска држава во светот е срамота. Нема да му се поклониме“, напиша Нетанјаху во петокот на социјалната мрежа Х.
Прекршувајќи ја привремената одлука на Меѓународниот суд на правдата, Израел продолжува со нападите врз Појасот Газа, каде според палестинските здравствени власти, од 7 октомври досега се убиени најмалку 34.388 Палестинци, главно жени и деца.
Израелската војна турна 85 отсто од населението на Појасот Газа во внатрешно раселување со акутен недостиг на храна, чиста вода и лекови, додека 60 отсто од инфраструктурата на енклавата е оштетена или уништена, според податоците на Обединетите нации.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.
