Обединетите нации во четвртокот објавија дека решението за две држави не може да се отфрли, како реакција и одговор на резолуцијата усвоена од израелскиот парламент со која се отфрла формирањето на палестинска држава.
Портпаролот Стефан Дужарик изјави дека генералниот секретар на ОН Антонио Гутереш е разочаран од одлуката на израелскиот парламент (Кнесет) да ја усвои резолуцијата.
„Јасно е дека не можете да го отфрлите решението за две држави“, им рече Дужарик на новинарите.
Тој потсети дека Гутереш во неколку наврати изјавил дека верува оти ставањето крај на окупацијата и преговорите за решение со две држави, каде што Израел и независната, демократска и суверена држава Палестина, постојат во мир и безбедност во границите од 1967 година со Ерусалим (Ал Кудс) како главен град на двете држави, единствениот остварлив пат кон мирот за народот на Израел и за народот на Палестина.
„Значи, за нас усвоениот предлог е спротивен на резолуциите на ОН, меѓународното право и претходните договори, а Гутереш уште еднаш искрено ги повикува Израелците и сите страни да не прават ништо што нѐ оддалечува од решението за две држави“, додаде Дужарик.
Во резолуцијата усвоена од Кнесетот се наведува дека формирањето на палестинска држава „во срцето на Израел би претставувало егзистенцијална закана за државата Израел и нејзините граѓани, би го продлабочило израелско-палестинскиот конфликт и ќе го дестабилизира регионот“.
Гласањето се случи пред премиерот Бенјамин Нетанјаху да замине за Вашингтон во недела за да се сретне со американскиот претседател Џо Бајден и да се обрати во Конгресот.
Во февруари, Кнесетот гласаше за еднострано отфрлање на признавањето на палестинската држава.
