Европската Унија денес го критикуваше нападот врз седиштето на Агенцијата на Обединетите нации за палестински бегалци (УНРВА) во окупираниот Источен Ерусалим (Источен Кудс) од страна на група израелски екстремисти.
„ЕУ остро го осудува нападот врз просториите на УНРВА во Источен Ерусалим. Сторителите мора да одговараат“, истакна шефот за надворешна политика на ЕУ, Жозеп Борел, преку социјалната мрежа Х.
Нагласувајќи дека Израел има одговорност да ја осигури безбедноста на хуманитарните работници, тој рече: „УНРВА е незаменлив спас за милиони луѓе во Газа и во регионот.“
Група израелски екстремисти протестираа пред седиштето на УНРВА во населбата Шеик Џарах во Источен Ерусалим на 7 мај, по повикот на заменик-градоначалникот на Ерусалим, Арје Јицак Кинг.
Претходно и Генералниот секретар на Обединетите нации Антонио Гутереш го осуди нападот, во кој израелски екстремисти запалија област во близина на седиштето на УНРВА. Гутереш на социјалните мрежи порача дека нападите врз хуманитарните работници и објекти се целосно неприфатливи, истакнувајќи дека тоа мора да престане. Генералниот комесар на УНРВА, Филип Лазарини, објави дека израелските екстремисти двапати ја запалиле областа околу седиштето на УНРВА во окупираниот Источен Ерусалим додека персоналот на УНРВА и другиот персонал на ОН биле во објектот.
