Поранешниот американски потпретседател, Мајк Пенс, кој е кандидат за претседателските избори 2024, рече дека судењето на поранешниот претседател Доналд Трамп испраќа „ужасна порака“ до светот за државата.
Пенс одговараше на прашањата на „Meet the Press“ на американската телевизија „Ен-би-си њуз“ (NBC News) за случајот во кој Трамп е обвинет за поседување доверливи државни документи во неговата резиденција.
Истакнувајќи дека судењето на поранешниот американски претседател од страна на актуелната администрација испраќа „ужасна порака“ до светот за Соединетите Американски Држави (САД), тој рече дека обвинението против Трамп „послужи само за дополнително да се подели нашата поделена политика“.
Тој нагласи дека иако обвинувањата против Трамп се „сериозни“, релевантните институции не го зазеле истиот став во однос на доверливите документи пронајдени во домот и канцеларијата на претседателот Џо Бајден и обвинувањата против неговиот син Хантер.
Истакнувајќи дека Министерството за правда треба да ги третира сите подеднакво, Пенс одби да одговори дали ќе го помилува Трамп доколку биде избран за претседател во 2024 година.
„Не знам зошто некои од моите ривали во републиканските прелиминарни избори претпоставуваат дека претседателот ќе биде прогласен за виновен“, рече тој.
Пенс, кој се дистанцира од Трамп поради неговите наводи за измама на претседателските избори во 2020 година и поради нападот на американскиот Капитол на 6 јануари 2021 година, во минатото има изјавено дека се надева оти Трамп може да види дека е „доведен во заблуда од неговиот правен тим“ во врска со изборите во 2020 година.
„Секој што се става пред Уставот не треба да биде претседател“, рече Пенс.
