Само неколку дена пред Доналд Трамп да се врати во Белата куќа, иранскиот претседател го повтори категоричното негирање на неговата земја дека е дел од заговор за убиство на Трамп за време на неговата изборна кампања минатата година.
Масуд Пезешкијан ги даде забелешките во своето прво интервју за американски медиум откако Трамп преживеа обид за атентат минатиот јули, а исто така и откако американското Министерство за правда во ноември обвини Иранец во врска со заговор за убиство на Трамп претходниот месец. Трамп победи на изборите на 5 ноември и треба да ја преземе функцијата следниот понеделник.
„Никогаш не сме се обиделе да започнеме со тоа, и никогаш нема да го направиме тоа“, рече Пезешкијан во интервјуто за Ен-Би- Си Њуз во Техеран во вторникот.
Тој продолжи со констатација дека обвинувањата оти Иран се обидел да го убие Трамп се дел од „шемите на странци“ - мислејќи на Израел и други земји - да се „хранат со иранофобијата“.
Во врска со односите со САД и тензиите со западните земји околу иранското нуклеарно прашање, заедно со неодамнешните закани од Трамп дека ќе ги зголеми санкциите и ќе изврши поголем притисок врз Иран, Пезешкијан обвини дека САД „се обиделе да го срушат Иран“.
„Се надевам дека Трамп ќе работи за мир во регионот и светот, а не обратно да придонесе за крвопролевање или војна“, рече тој.
Во врска со дијалогот со САД и западните земји, иранскиот претседател рече дека неговата земја „ги исполнила сите обврски“ во врска со својата нуклеарна програма, додавајќи: „Но за жал, другата страна беше таа што не ги исполни своите ветувања и обврски.
Запрашан за евентуален американско-израелски воен напад врз Иран, тој рече дека Иран „ќе реагира на секоја акција и ќе се брани“, нагласувајќи дека секој напад врз Иран „ќе биде штетен за сите актери“, не само за Иран.
Во врска со прашањето за тековните напори за прекин на огнот во Газа меѓу Израел и палестинската група Хамас, Пезешкијан рече дека Иран прави се што може „за да надвладее мирот во регионот“.
Неодамнешните коментари на учесниците во разговорите за прекин на огнот укажаа на веројатно неизбежен договор.
