Владата во Појасот Газа соопшти дека повеќе од 9.000 луѓе загинале во блокираната енклава, која е под интензивни израелски напади, бидејќи не можелa да им се пружи медицинска помош поради колапсот на здравствениот систем.
Исмаил ес-Севабите, генерален директор на владината канцеларија за медиуми во Газа, изјави дека 23 болници во Појасот Газа не се во функција поради израелските напади.
Посочувајќи дека бројот на жртвите може да се зголеми поради колапсот на здравствениот систем во Газа, Севабите нагласи дека повеќе од 9.000 Палестинци ги загубиле животите бидејќи не им била укажана соодветна медицинска помош.
Тој посочи дека помошта испратена до Појасот Газа е доволна само за два отсто од потребите во здравствениот сектор.
Севабите изјави дека дневно треба да се доставуваат 1.000 камиони со помош за ревитализација на здравствениот систем во Појасот Газа, врз кој Израел продолжува со нападите 80 дена.
Министерството за здравство во Газа соопшти дека повредените починале поради недостиг на активни болници на северот од блокираната енклава.
Беше објавено дека болницата Ал-Ахли, која беше последна активна во градот Газа, не е во функција од 19 декември.
Констатирано е дека ситуацијата е надвор од контрола во болниците на југот на Појасот Газа поради недостиг на медицински материјали, раселените лица кои се засолнуваат во болниците и голем број повредени.
Министерството за здравство во Газа често го повторува својот повик до земјите ширум светот и меѓународните организации да основаат мобилни болници.
Израел започна со напади врз Појасот Газа по прекуграничен напад на Хамас на 7 октомври, и оттогаш најмалку 20.424 Палестинци, главно жени и деца, се убиени, а 54.036 се ранети.
Израелските напади го оставија Појасот Газа во урнатини со половина од станбениот фонд оштетен или уништен, а околу два милиони луѓе се раселени во густо населената палестинска енклава со недостиг на храна и чиста вода.
