Над 305.000 тони жито се безбедно испорачани од украинските пристаништа преку 10 трговски бродови за една недела, како дел од неодамнешниот договор за извоз на жито потпишан меѓу Туркије, Обединетите нации (ОН), Русија и Украина.
Во рамките на договорот постигнат со посредство на Туркије, четири бродови со вкупно 170.458 тони пченка се планирани да стигнат до турските пристаништа. Бродот „Поларнет“ со 12.000 тони пченка пристигна на пристаништето во Деринџе, во турската северозападна област Коџаели.
Дестинациите на другите шест бродови се Италија, Кина, Ирска, Велика Британија и Либан.
Во согласност со договорот за коридорот за жито, товарниот брод „Разони“ под знамето на Сиера Леоне, што превезува 27.000 тони пченка во Либан, беше првиот брод што го напушти украинското пристаниште Одеса на 1 август.
Бродот „Нави-стар“ под знамето на Панама, кој превезуваше 33.000 тони пченка од Украина до Ирска, и бродот „Ројен“ со знаме на Малта, кој превезува 13.000 тони пченка во Велика Британија, испловија на 5 август.
Бродот „Фулмар С“ со знаме на Барбадос, кој го напушти пристаништето во Бандирма на 5 август, пристигна во пристаништето Черноморск во регионот Одеса во Украина на 7 август. „Фулмар С“ е првиот брод што пристигна во украинските пристаништа да прими товар.
Празниот брод „Оспреј С“ под знамето на Либија исто така замина за пристаништето во Черноморск за да преземе испорака на жито по инспекциите во Истанбул извршени вчера.
Во рамките на договорот, бродот „Мустафа Неџати“ со 6.000 тони сончогледово масло за Италија, бродот „Стар Хелена“ со 45.000 тони сончоглед во Кина и бродот „Глори“ со 66.000 тони пченка за Истанбул исплови од пристаништето Черноморск.
На 7 август, бродот „Рива Винд“, кој превезуваше 44.000 тони пченка за Искендерун, Туркије, тргна од пристаништето Одеса.
Бродот „Сакура“ со 11.000 тони соја за Италија го напушти пристаништето во Јужни, а бродот „Аризона“, со 48.458 тони пченка за Искендерун, го напушти денеска пристаништето во Черноморск.
Вкупно, 10 трговски бродови со 305.458 тони жито безбедно тргнаа од украинските пристаништа како дел од решението за глобалната криза со храна.
На 22 јули, Туркије, ОН, Русија и Украина потпишаа договор во Истанбул за повторно отворање на три украински пристаништа за извоз на украинско жито, што со месеци беше блокирано поради руско-украинската војна, која сега е во шестиот месец.
За да се надгледува украинскиот извоз на жито, на 27 јули официјално беше отворен Заедничкиот координативен центар во Истанбул, составен од претставници од трите земји и ОН за да се овозможи безбеден транспорт со трговски бродови на комерцијални прехранбени производи и ѓубрива.
