Индискиот и пакистанскиот премиер денеска му честитаа на републиканскиот кандидат Доналд Трамп, кој прогласи победа на претседателските избори во САД.
„Најсрдечни честитки пријателе Доналд Трамп за твојата историска изборна победа. Се радувам на нашата повторна соработка во насока на јакнење на сеопфатното глобално и стратешко партнерство на Индија и САД. Заедно, да работиме за подобрување на нашиот народ и да промовираме глобален мир, стабилност и просперитет“, напиша индискиот премиер Нарендра Моди во честитката на X.
Пакистанскиот премиер Шехбаз Шариф, повика на понатамошно зајакнување на американско-пакистанското партнерство.
„Честитки до новоизбраниот претседател Доналд Трамп за неговата историска победа за втор мандат! Со нетрпение очекувам тесна соработка со идната администрација за дополнително зајакнување и проширување на партнерството меѓу Пакистан и САД“, објави Шариф на X.
