Гренланд не е на продажба, изјави денеска премиерот на таа данска автономна територија Муте Егеде, реагирајќи на најавата на новоизбраниот американски претседател Доналд Трамп дека САД ќе ја преземат „сопственоста и контрола“ на овој арктички остров.
„Гренланд е наш. Не сме на продажба и никогаш нема да бидеме на продажба. Не смееме да ја изгубиме нашата долга борба за слобода“, рече Егеде.
Трамп во неделата објави дека го избрал Кен Хаури, поранешниот американски амбасадор во Шведска, за нов американски амбасадор во Данска.
Трамп на својата платформа Тру Сосиал (Truth Social) напиша дека е апсолутно неопходно САД да ја преземат сопственоста и контролата на Гренланд за, како што рече, националната безбедност и слободата низ целиот свет.
Американскиот конгресмен од Грузија, Мајк Колинс, сојузник на Трамп, во ноември предложи САД повторно да се обидат да го купат Гренланд, кој ѝ припаѓа на Данска.
Трамп во 2019 година изрази интерес за купување на Гренланд, нарекувајќи го „голем договор за недвижнини“.
Волстрит журнал тогаш објави дека Трамп всушност ги сака богатите природни ресурси на данскиот остров, но данскиот премиер Мете Фредериксен ја нарече идејата „апсурдна“, посочувајќи дека Гренланд „не е на продажба“.
Гренланд содржи огромни наслаги на ретки елементи кои се користат во производството на електрични возила и турбини на ветер.
Островот е автономен од 1979 година, а Данска ја задржува контролата над надворешните работи, одбраната и монетарната политика.
Од 2010 година, автономијата на Гренланд се прошири на подземните ресурси, вклучувајќи ги и активностите за истражување и експлоатација на минерали.
САД се обидоа да го купат Гренланд од Данска неколку пати, вклучително и во 1867 година, кога државниот секретар Вилијам Х. Севард преговараше за купување на Алјаска од Русија.
Вториот обид да се купи се случил во 1910 година, а во 1946 година американската влада и понудила на Данска понуда од 100 милиони долари, која ја одбила.
