Пронајдени се двете црни кутии од авионот што се урна по судир со воен хеликоптер кај главниот град на САД, Вашингтон, соопштија од владина агенција.
Националниот одбор за безбедност на транспортот (НОБТ) информира дека истражувачите ги пронашле снимачот на гласови од кабината и снимачот на податоци за летот од авионот „Бомбардиер CRJ700“, кој учествуваше во судирот што се случи во средата на аеродромот „Роналд Реган“.
„Снимачите се наоѓаат во лабораториите на НОБТ на проценка“, се наведува во соопштението на оваа агенција. НОБТ е независна владина агенција задолжена за истражување на несреќи во цивилниот транспорт.
Авионот на „Американ ерлајнс“ превезуваше 60 патници и четири члена на екипажот кога во воздух се судри со армискиот хеликоптер „БлекХок“ со тројца војници.
Двете летала се урнаа во реката Потомак.
На прес-конференцијата во Белата куќа американскиот претседател Доналд Трамп изјави дека никој не преживеал во несреќата.
Според извори од полицијата, „Си-би-ес њуз“ објави дека до 17:30 часот по источнозападно време се пронајдени најмалку 40 тела.
Во извештајот, исто така, се наведува дека меѓу жртвите има 14 уметнички лизгачи, а извршниот директор на Клубот за уметничко лизгање во Бостон, Даг Зегибе, соопшти дека шест жртви се членови на нивниот клуб, меѓу кои двајца тренери, двајца тинејџери-атлети и две мајки на спортисти.
Меѓу загинатите има и лизгачи од Русија.
Повикувајќи се на прелиминарниот безбедносен извештај на Федералната администрација за авијација (ФАА) за судирот, весникот пишува дека еден контролор управувал со комуникациите за хеликоптерите и авионите, задача што обично ја извршуваат две лица.
