Американскиот државен секретар Марко Рубио денеска изјави дека мирот во Украина е клучот за отворање економски можности со Русија.
По разговорите меѓу делегациите на САД и Русија за Украина во Ријад, тој рече дека дел од фокусот е да се осигура дека дипломатските претставништва можат да функционираат и да водат диплатматски односи во живо и дека друг елемент на состанокот е да се спроведат мировни преговори за Украина, кои, според него, ќе вклучуваат „ангажман и консултации“ со Украина и „партнерите во Европа“.
Како трета тема, Рубио го истакна создавањето на извонредна можност, доколку овој конфликт дојде до прифатлив крај, а тоа е да се здружат силите со Русите геополитички, за прашања од заеднички интерес и економски.
„Се надеваме дека дипломатскиот дел ќе напредува прилично брзо, бидејќи вклучува ангажман на нашите мисии“, рече Рубио на прес-конференцијата на американската делегација.
Рубио рече дека претседателот на САД е единствениот лидер кој може да донесе мир во Украина.
Тој рече дека завршувањето на украинскиот конфликт мора да биде прифатлив за сите инволвирани страни, вклучувајќи ги Украина, Европа и Русија.
„ЕУ во одреден момент мора да биде на преговарачка маса, бидејќи воведе санкции кон Русија. Трамп сака фер да го заврши конфликтот, нема да дозволи да се повтори за 2 до 3 години. Целта е да се обезбеди мир за Украина кој е праведен, траен, одржлив и прифатлив за сите вклучени страни“, рече тој.
Рубио рече дека „останува уште многу работа“ и дека целта на денешната средба е „воспоставување линии на комуникација“ по долгиот период на молк меѓу Вашингтон и Москва.
Тој исто така изрази уверување дека Русија сака да постигне договор.
Во денешните американско-руски преговори за Украина, руската делегација ја сочинуваа министерот за надворешни работи Сергеј Лавров, претседателскиот советник Јуриј Ушаков и директорот на рускиот фонд за директни инвестиции Кирил Дмитриев, додека американската делегација ја сочинуваа Рубио, советникот за национална безбедност на американскиот претседател Доналд Трамп, Мајк Волц и специјалниот пратеник на САД за Блискиот Исток, Стивен Виткоф.
