Русија ги предупреди Соединетите Американски Држави (САД) да не го испраќаат својот систем за противракетна одбрана „Патриот“ во Украина, нагласувајќи дека тоа го зголемува ризикот од директно вклучување на Вашингтон во конфликтот.
„Многу експерти, вклучително и оние во странство, се сомневаат во мудроста на таквиот чекор, кој би довел до ескалација на конфликтот и би го зголемил ризикот од директно вклучување на Американската армија во непријателствата“, рече портпаролката на руското Министерство за надворешни работи, Марија Захарова, во текот на вчерашниот брифинг со новинарите.
Таа истакна дека САД вршат притисок врз другите земји членки на НАТО за „позначајна“ воена поддршка за Украина.
„Русија го гледа целото оружје што ѝ е доставено на Украина како легитимна воена цел кое може да биде уништено или запленето“, рече Захарова.
