Русија денес соопшти дека испратила 33 тони хуманитарна помош во Либан, каде израелските воени авиони извршија воздушни напади врз главниот град Бејрут во текот на ноќта.
Специјален авион Ил-76 пренесе 33 тони хуманитарна помош по налог на претседателот Владимир Путин и министерот за вонредни ситуации Александар Куренков, се вели во соопштението на Министерството за вонредни ситуации.
Во соопштението се вели дека помошта вклучува храна, основни производи, лекови и агрегати.
Официјалната либанска Национална новинска агенција соопшти дека до утринава израелските сили извршиле 17 воздушни напади врз Бејрут и едно од неговите јужни предградија.
Израел започна со масовни воздушни напади на 23 септември врз, како што ги нарекува, локации на Хезболах низ Либан, во кои загинаа повеќе од 1.100 лица, а над 3.000 беа повредени, според либанското Министерство за здравство.
Во израелските напади беа убиени членови на највисокото раководство на Хезболах, меѓу кои и лидерот Хасан Насрала.
Хезболах и Израел разменуваат прекуграничен оган од почетокот на израелската војна во Газа, во која загинаа речиси 41.600 луѓе, главно жени и деца, по прекуграничниот напад на Хамас минатиот 7 октомври.
Меѓународната заедница предупреди дека израелските напади врз Либан би можеле да го претворат конфликтот во Газа во поширока регионална војна.
