Четворица полицајци се убиени, а четворица се ранети вчера во престрелка во Шарлот во американската сојузна држава Северна Каролина, соопшти полицијата.
Осомничениот, кој од пушка отвори оган врз полицајците кога тие пристигнаа во неговиот дом, исто така, беше убиен за време на престрелката, соопшти полицискиот оддел во Шарлот-Мекленбург.
Началникот на полицијата Џони Џенингс, на прес-конференција рече дека тројцата убиени полицајци се членови на оперативна група за потраги по осуденици, која ја сочинуваат полицајци од различни агенции.
Полицајците биле убиени додека требало да му предадат потерница за апсење на осуден криминалец. Тие стигнале до куќата каде што бил осомничениот, кога тој почнал да пука во нив, изјави Џенингс.
Тие возвратиле и осомничениот бил убиен во дворот пред куќата.
Полицајците потоа почнале да пукаат внатре во куќата. По престрелката специјалците ја пребарале куќата и привеле две лица.
Се верува дека најмалку еден од нив пукал кон полицијата, рече Џенингс.
„Херојските постапки на овие полицајци се доказ за опасностите со кои се соочуваат нашите полицајци секојдневно. Денес некои од нашите колеги ја направија крајната жртва за безбедноста и заштитата на нашата заедница“, соопшти полицијата на платформата Х.
Американскиот претседател Џо Бајден е информиран за пукањето и разговараше со гувернерот на Северна Каролина, Рој Купер, за да ѝ изрази сочувство и поддршка на заедницата, соопшти Белата куќа.
„Мора да направиме повеќе за да ги заштитиме нашите службеници за спроведување на законот“, рече Бајден.
Тој додаде дека е неопходно да се финансира полицијата за да ѝ се обезбедат ресурси за да си ја заврши работата.
„Сега конгресните лидери мора да се обврзат да забранат јуришно оружје и магацини со голем капацитет што бараат безбедно складирање оружје. Доста е“, додаде Бајден.
