Американската администрација се подготвува да продаде 50 борбени авиони Ф-15 на Израел во вредност од 18 милијарди долари.
Во веста објавена на американскиот канал Си-Ен-Ен, врз основа на неименувани функционери од администрацијата на американскиот претседател Џо Бајден, беше посочено дека се блиску до нова продажба на оружје на Израел.
Новинските извештаи велат дека имало многу состаноци меѓу администрацијата на Бајден и Конгресот во врска со воените авиони, кои Израел првпат се обидел да ги купи во јануари 2023 година, а неофицијално процесот е завршен.
Беше објавено дека официјалното известување за продажбата, кое на 30 јануари доби зелено светло од Мајкл Мекол, претседател на Комисијата за надворешни работи на Претставничкиот дом, се очекува наскоро од администрацијата на Бајден да биде испратено до Конгресот.
Останува да се види како ќе реагираат демократските сенатори и претставници кои ја критикуваат безусловната поддршка за Израел во текот на 15-дневниот период на оценување во Конгресот во врска со оваа продажба на оружје.
Некои сенатори сакаа да престане продажбата на оружје на Израел и напишаа писмо до американскиот претседател Џо Бајден, барајќи истрага за тоа како американското оружје се користело во Газа.
Наведено е дека по завршувањето на процесот во Конгресот, Израел ќе започне со купување на воени авиони Ф-15 најрано во 2029 година, а Тел Авив ќе купува и наведувани ракети од Вашингтон.
Одговарајќи на прашањето на новинарот на Анадолу на оваа тема, американскиот Стејт департмент изјави дека не ги оценуваат тековните процеси на продажба на оружје, туку како и за другите земји, продажбата на оружје на Израел е извршена во согласност со утврдените законски процедури.
Во вестите во петокот, цитирајќи неименувани претставници на Пентагон и Стејт департментот, американскиот весник „Вашингтон пост“ објави дека администрацијата на Бајден неодамна одобрила нови испораки на оружје за Израел.
Соопштено е дека американската администрација, без јавно објавување, одобрила продажба на 25 авиони Ф-35 и авионски мотори на Израел, кој продолжува со нападите во Газа, како инеколку видови бомби.
Се наведува дека бомбите МК84, кои Израел ги користел при бомбардирањето на Појасот Газа и одиграле голема улога во убивањето на цивилите, а се и во планираната набавка, тежат околу 900 килограми и предизвикуваат разорна штета.
