Преговорите меѓу Русија и Соединетите Американски Држави (САД) за подобрување на односите, како и за војната во Украина – први од ваков вид по неколку години – завршија по 4 и пол часа.
Говорејќи на прес-конференција на маргините на средбата во саудискиот главен град Ријад, која беше пренесувана во живо на руската телевизија, помошникот на рускиот претседател, Јуриј Ушаков, изјави дека преговорите биле продуктивни, при што Москва и Вашингтон се согласиле да ги земат предвид заемните интереси.
Сепак, датумот за средба меѓу рускиот претседател Владимир Путин и неговиот американски колега Доналд Трамп сè уште не е утврден, а според Ушаков, малку е веројатно дека таа ќе се одржи следната недела.
„Делегациите на Русија и САД имаа сериозна дискусија за сите клучни прашања“, истакна тој.
„Двете страни се согласија и за формирање работни групи за прашањето со Украина. Додека бројот на членови и конкретните учесници сè уште не се одредени, целта на двете страни е што побрзо да воспостават контакти“, додаде Ушаков.
Преговорите меѓу Русија и САД, чија цел беше подобрување на односите, разгледување на конфликтот во Украина и подготовка на средба меѓу претседателите на двете земји, претставуваат прва средба меѓу дипломати од двете земји откако започна војната во Украина на 24 февруари 2022 година, пред речиси три години.
