Американската администрација соопшти дека не е известена за датумот на израелската копнена операција во Рафах, на југот на Газа.
Портпаролот на американскиот Стејт департмент, Метју Милер, ја коментираше изјавата на израелскиот премиер Бенјамин Нетанјаху дека е одреден датумот за операцијата во Рафах.
Милер наведе дека не се известени за копнената операција.
„Сѐ уште не видовме да презентираат веродостоен план за 1,4 милиони цивили во Рафах“, рече портпаролот на американскиот Стејт департмент.
Нагласувајќи дека „операцијата од големи размери“ против Рафах ќе има лоши последици за цивилите, Милер нагласи дека на крајот тоа би ја загрозило безбедноста на Израел.
„Јасно им ставивме до знаење на Израел оти мислиме дека има подобар начин да се порази Хамас, кој сѐ уште е во Рафах, и да се постигне легитимната цел“, посочи Милер.
Израелскиот премиер Бенјамин Нетанјаху синоќа изјави дека е одреден датумот за копнен напад на Рафах, во јужниот дел на Појасот Газа, каде што засолниште најдоа околу 1,5 милиони Палестинци од другите делови на палестинската енклава.
Нетанјаху на својот профил на социјалната мрежа Х наведе дека нивна цел е ослободување на заробениците во Газа и „победа над Хамас“.
Тој тврди дека за тоа е неопходен напад на Рафах.
Што се однесува до копнениот напад на Рафах, каде што се засолнети 1,5 милиони луѓе раселени поради израелските напади, Нетанјаху рече: „Ова ќе се случи, има датум.“
Белата куќа синоќа објави дека преговорите за Рафах, кои беа планирани за оваа недела во Вашингтон меѓу делегациите на САД и Израел, уште еднаш се одложени поради „тековните преговори за прекин на огнот“.
Градот Рафах, кој се наоѓа на југот на Газа на границата со Египет, беше дом на приближно 280.000 Палестинци пред израелските напади. Поради израелските напади на 7 октомври, 1,9 милиони луѓе се раселија низ Појасот Газа, кој има 2,3 милиони жители.
Повеќето од раселените Палестинци се засолнија во Рафах, за кој Израел претходно тврдеше дека е „безбеден“. Со пристигнувањето од северните региони, населението во Рафа се зголеми за повеќе од четирипати, достигнувајќи 1,5 милиони.
Повеќето Палестинци, кои се засолнија во Рафах поради недостиг на сместување, се борат да преживеат во кампови со импровизирани шатори.
Израелските сили често го бомбардираат Рафах и се стравува дека доколку Израел изврши копнен напад врз овој град, цивилите ќе немаат засолниште во Појасот Газа.
