Одредувањето на победникот на утрешните претседателски избори во Соединетите Американски Држави (САД) - републиканецот Доналд Трамп или демократката Камала Харис, би можело да потрае повеќе од 24 часа бидејќи се очекува тесна трка во седум неопределени држави (т.н. свинг држави), јавуваат американските медиуми, пренесува Анадолу.
Ерата на прогласување победник во изборната ноќ речиси сигурно е завршена, според Ен-би-си, а за да се прогласи нов претседател уште во среда би требало резултатите во клучните држави да не се ни приближно изедначени.
За да се направи сигурна проекција, мора да има значителна разлика меѓу кандидатите, додава телевизијата, наведувајќи ја како пример претседателската трка во 2020 година кога во Џорџија и Аризона, Џо Бајден победи со само 11.779 гласа во едната и 10.457 гласа во другата држава.
Значи, овој пат сите гласови мора да се пребројат пред да се прогласи прелиминарен победник. Тој процес може да потрае со денови, се вели.
Оваа година некои резултати би можело побавно да се објавуваат поради промените во начинот на кој некои сојузни држави, вклучително и седум неопределени, ги спроведоа своите избори во 2020 година.
Спротивно на тоа, пребројувањето на гласовите во државите како Мичиген се следи брзо и се очекуваат значително помалку гласачки ливчиња по пошта отколку на претходните избори, кои се одржаа за време на пандемијата на КОВИД-19.
Ова укажува дека се можни неколку исходи и дека победникот би можел да биде прогласен во изборната ноќ, следното утро или дури денови или недели подоцна.
Истакнувајќи дека секоја држава го одредува периодот на гласање, Блумберг забележа дека иако повеќето држави можат да почнат да известуваат за прелиминарни резултати неколку минути по затворањето на гласачките места, државните закони и различните временски зони понекогаш може да го комплицираат процесот на известување.
На пример, областите во источната временска зона, во државите Кентаки и Индијана, ќе почнат да известуваат за пребројувањето на гласовите додека гласачите во централната временска зона сè уште го даваат својот глас.
Другите држави, како Алабама, Алјаска, Орегон и Јужна Дакота, обично се воздржуваат од објавување на какви било резултати додека гласањето не заврши насекаде. Покрај тоа, според државните закони во Аризона и Ајдахо официјалните лица чекаат еден час по затворањето на гласачките места пред да објават какви било резултати.
Доколку претседателските избори во 2020 година се некаква индикација, би можело да поминат неколку дена додека се објават резултатите.
На тие избори Асошиетед прес не го прогласи Џо Бајден за победник до саботата, иако изборите се одржаа во вторник.
Поранешниот американски претседател и републикански претседателски кандидат Доналд Трамп за Еј-би-си њуз изјави дека победникот ќе биде познат во вторник на изборната ноќ, тврдејќи дека има значително водство во однос на противкандидатката Камала Харис.
Американските гласачи на 5 ноември ќе одлучат кој ќе го води американскиот Конгрес, со одлука дали во Белата куќа ќе биде поранешниот претседател Доналд Трамп или потпретседателката Камала Харис. Која политичка партија и да заврши со водство во Претставничкиот дом или Сенатот, ќе биде од клучно значење новиот претседател да ја спроведе својата законодавна агенда.
Изборите во САД, како и во претходните изборни циклуси, така и оваа година ќе ги одбележат таканаречените „свинг“ држави, односно неопределени држави, специфични по тоа што не може со сигурност да се утврди за кој претседателски кандидат ќе гласаат до последен момент.
Аризона, Џорџија, Мичиген, Невада, Северна Каролина, Пенсилванија и Висконсин се седум клучни држави на овие избори.
Повеќе од 78 милиони Американци гласаа предвреме, вклучително и околу 700.000 повеќе демократи од републиканци, според податоците објавени од Изборната лабораторија на Универзитетот во Флорида.
