Американскиот сенатор Берни Сандерс ги отфрли контроверзните предлози на американскиот претседател Доналд Трамп за иднината на Газа, велејќи дека енклавата разурната од војната треба повторно да се изгради за Палестинците, а не за богатите инвеститори.
„Убиени над 47.000 Палестинци и 111.000 повредени. Одговорот на Трамп? Насилно протерајте ги Палестинците за Газа да стане недвижен имот во иднината. Прекрасно парче земја. Не. Газа треба да се обнови за палестинскиот народ, а не за туристите милијардери“, рече сенаторот Сандерс на мрежата X.
Трамп вчера изјави дека на Палестинците кои го напуштаат опколениот Појас Газа нема да им биде дозволено да се вратат, според неговиот план САД да ја преземат сопственоста на крајбрежната енклава.
„Ќе изградиме безбедни заедници малку подалеку од местото каде што се наоѓаат, каде што е целата оваа опасност. Во меѓувреме, јас би го поседувал ова. Размислете за тоа како развој на недвижнини за иднината, тоа би било прекрасно парче земја“, рече Трамп за време на интервјуто за Фокс њуз.
На директно прашање на неговиот соговорник дали Палестинците ќе имаат право на враќање, Трамп беше категоричен.
„Не, не би имале, бидејќи ќе имаат многу подобро живеалиште“, рече Трамп.
Трамп го даде својот предлог во услови на тековен прекин на огнот што ја запре израелската војна во Газа по 15 месеци.
Неговиот план да ја преземе сопственоста на Газа беше целосно отфрлен на светската сцена, но Трамп продолжува со тоа, тврдејќи дека може да ги принуди Египет и Јордан да ги населат палестинските бегалци.
