Американскиот сенатор Берни Сандерс синоќа изјави дека сега нема оправдување Израел да ја продолжи војната во Појасот Газа по убиството на лидерот на Хамас Јахја Синвар.
„Сега нема оправдување премиерот Бенјамин Нетанјаху и неговата екстремистичка влада да ја продолжат својата сеопфатна војна против палестинскиот народ, во која загинаа 42.000 Палестинци, а рани 100.000, од кои две третини се жени, деца и постари лица“, изјави Сандерс.
Тој нагласи дека Израел нема оправдување да продолжи да ја задржува хуманитарната помош, да ги уништува домовите, здравствената заштита, инфраструктурата и дополнително да го одложи договорот за размена на заробеници и прекинот на огнот во опколениот Појас Газа.
„И нема апсолутно никакво оправдување за континуираната поддршка на САД за ужасната политика на Нетанјаху, која е јасно кршење на американското и меѓународното право“, рече сенаторот Сандерс.
Осврнувајќи се на легислативата што ја предложи минатиот месец за блокирање на повеќе од 20 милијарди долари од американска продажба на оружје на Израел, Сандерс рече дека Сенатот ќе гласа за Заедничките резолуции за неодобрување кога повторно ќе се состане во ноември.
„Мораме да ставиме крај на нашето соучесништво во оваа сурова и незаконска војна“, заклучи Сандерс.
Изјавата на Сандерс дојде откако портпаролот на израелската војска Авихае Адри објави дека лидерот на палестинското движење Хамас, Јахја Синвар е убиен во израелски напад во Газа.
Синвар стана политички шеф на Хамас во август, наследувајќи го Исмаил Ханије, кој беше убиен во иранскиот главен град Техеран на 31 јули.
