Советот за безбедност на Обединетите нации во средата го повика Израел да ја поништи одлуката за забрана на Агенцијата на ОН за палестински бегалци (УНРВА), нарекувајќи ја столбот на хуманитарниот одговор во Појасот Газа.
„Членовите на Советот за безбедност силно предупредија против какви било обиди за распуштање или намалување на операциите и мандатот на УНРВА, истакнувајќи дека секој прекин или суспендирање на неговата работа ќе има тешки хуманитарни последици за милионите палестински бегалци кои зависат од услугите на Агенцијата како и импликации за регионот“, се наведува во соопштението.
И покрај протестите од целиот свет, израелските пратеници во понеделникот усвоија закон со кој се забранува УНРВА да работи во Израел и окупираните територии.
Израел ги обвини вработените во УНРВА за соучесништво во прекуграничниот напад на Хамас на 7 октомври 2023 година. УНРВА, сепак, ги негираше наводите.
Членовите на Советот за безбедност изразија „сериозна загриженост“ поради израелското законодавство и го повикаа Тел Авив да се придржува до своите меѓународни обврски и да ги почитува привилегиите и имунитетите на агенцијата на ОН.
„Членките на Советот за безбедност бараат од сите страни да и овозможат на УНРВА да го изврши својот мандат, како што е усвоен од Генералното собрание, во сите области на неговото работење, со целосно почитување на принципите на хуманост, неутралност, непристрасност и независност и да ги почитува меѓународното хуманитарно право, вклучително и заштитата на ОН и хуманитарните објекти“, се наведува во соопштението.
Тие, исто така, побараа сите страни да ги преземат неопходните чекори за да се овозможи и олесни хуманитарната помош за цивилите во Газа, во согласност со меѓународното хуманитарно право.
