Германскиот претседател Франк Валтер Штајнмаер на крајот од тридневната посета на Туркије изјави дека Германија и Туркије се согласуваат дека траен мир на Блискиот Исток ќе биде возможен преку решение со две држави, односно формирање на независни држави Палестина и Израел.
Посочувајќи го значењето на неговата посета на Анкара за односите меѓу Германија и Туркије, Штајнмаер рече дека за него е важно да ја посети Туркије, која ја слави стогодишнината од основањето на Републиката, како и стогодишнината од германско-турските дипломатски односи.
Германија и Туркије се сојузници во организацијата Г20, како и во НАТО.
Наведувајќи дека присуствувал на церемонијата во Газиантеп на 23 април, а потоа го посетил градот со привремени живеалишта, поставен за жртвите од минатогодишниот земјотрес во областа Нурдаги, Штајнмаер рече дека е импресиониран од разговорите таму.
„За мене беше значајно да го посетам тој регион една година по разорниот земјотрес. Беше задоволство да се види како на преживеаните брзо им беше обезбедено сместување и како на децата брзо им се овозможи да го продолжат своето образование“, рече Штајнмаер.
Нагласувајќи дека напорите за обнова во регионот погоден од земјотресот се восхитувачки, Штајнмаер рече дека Германија ќе продолжи да ги поддржува тие луѓе.
На прашањето за придобивките од визниот режим за турските граѓани или кога воопшто ќе се постигне напредок во визните процедури, Штајнмаер одговори дека бројот на вработени во Генералниот конзулат во Туркије е зголемен и дека се прават напори да се скрати времето на обработка и ќе биде можно побрзо закажување термини
Штајнмаер рече дека очекува турскиот претседател Ердоган да ја посети Германија за време на претстојното Европско фудбалско првенство (ЕВРО 2024), на кое ќе настапи и турската репрезентација.
