Израелскиот министер за финансии Безалел Смотрич во вторникот предложи дека „доброволната имиграција“ на Палестинците од Газа е „вистинското хуманитарно решение“ за ставање крај на тековниот конфликт.
Во изјавата на социјалната платформа X, Смотрич ја поддржа иницијативата на тврдокорните израелски пратеници, кои повикаа на протерување на жителите на Газа во земјите ширум светот како решение за конфликтот меѓу, како што рече, „Арапите и Евреите“.
„Ја поздравувам иницијативата за доброволно иселување на Арапите од Газа во земјите низ светот. Тоа е вистинско хуманитарно решение за жителите на Газа и целиот регион по 75 години егзил, сиромаштија и опасност. Државата Израел повеќе нема да може да го прифати постоењето на независен ентитет во Газа, додаде екстремно десничарскиот министер.
Исто така, Итамар Бен-Гвир, израелски министер за национална безбедност, ја изрази својата поддршка за предлогот за извлекување на Палестинците од Газа според пристапот на „доброволна имиграција“.
„Во моментот на вистината, сите зборуваат за Партија на еврејската сила (Оцма Јехудит)“, напиша Бен-Гвир на X, мислејќи на радикалните идеи на неговата партија против Палестинците.
Во понеделникот, израелските пратеници Дени Данон и Рам Бен Барак во текст за Волстрит журнал предложија дека преместувањето на Палестинците од Газа во нациите што ги прифаќаат е решение што става крај на „страдањето и болката на Евреите и Арапите“.
Ова не беше прва контроверзна реакција на Израел кон неговата тековна војна против Газа.
Минатата недела, израелскиот министер за наследство Амихаи Елијаху, член на екстремно десничарската партија Оцма Јехудит, рече дека фрлањето „нуклеарна бомба“ врз Појасот Газа е „опција“.
