Министрите за надворешни работи на НАТО учествуваат на дводневниот состанок во романскиот главен град Букурешт кој започнува во вторник. Министрите треба да разговараат за војната во Украина, која се смета за закана за евроатлантскиот мир и безбедност.
Генералниот секретар на НАТО, Јенс Столтенберг, пред состаноците рече дека рускиот претседател Владимир Путин се обидува да ја искористи зимата како оружје против Украина и дека Русија можеби ќе продолжи да ја напаѓа украинската електрична мрежа и инфраструктурата за природен гас.
Столтенберг додаде дека министрите за надворешни работи на НАТО ќе се сретнат со украинскиот колега Дмитро Кулеба за да разговараат за најитните потреби на Украина.
„НАТО ќе продолжи да биде со Украина онолку долго колку што е потребно. Нема да отстапиме. Не може да има траен мир ако победи агресорот“, рече Столтенберг.
Највисокиот украински дипломат рече дека министрите за надворешни работи на НАТО за време на состанокот ќе разговараат за обезбедување ново оружје, муниција и воена опрема за Киев.
Столтенберг: Руски притисок врз БиХ, Грузија и Молдавија
Исто така, ќе присуствуваат и министрите за надворешни работи на Босна и Херцеговина, Грузија и Молдавија за да разговараат за соработката со НАТО.
„Овие три земји се соочуваат со руски притисок на многу различни начини, така што на нашата средба ќе преземеме дополнителни чекори за да им помогнеме да ја заштитат својата независност и да ја зајакнат нивната способност да се бранат“, рече Столтенберг.
Кандидатурата за НАТО на нордиските земји
Столтенберг, исто така, рече дека е време да се финализира процесот на пристапување на Финска и Шведска и да се поздрават како полноправни членки на НАТО.
„Ова ќе ги направи побезбедни, НАТО посилен и евроатлантската област побезбедна, истакна тој.
Безбедносната загриженост на Анкара
Министерот за надворешни работи на Туркије Мевлут Чавушоглу, меѓу учесниците на состанокот на НАТО, се очекува да се сретне со германската министерка за надворешни работи Аналена Баербок и со британскиот министер за надворешни работи Џејмс Клеверли.
Тој, исто така, во понеделник најави дека во вторник ќе се одржи средба со шефовите на дипломатиите на Шведска и Финска во трипартитен формат.
Шведскиот премиер Улф Кристерсон рече дека безбедносните грижи на Анкара ќе бидат разгледани во рамките на трипартитниот меморандум од јуни.
Шведска и Финска формално поднесоа барање за влез во НАТО во мај, напуштајќи го децениското воено неврзување, одлука поттикната од руската војна против Украина.
Но, Туркије изрази приговори за нивните кандидатури за членство, обвинувајќи ги двете земји дека толерираат, па дури и поддржуваат терористички групи.
Туркије и двете нордиски земји потпишаа меморандум во јуни на самитот на НАТО во Мадрид за решавање на легитимните безбедносни грижи на Анкара, отворајќи го патот за членството на Финска и Шведска во НАТО.
Финска и Шведска ѝ даваат целосна поддршка на Туркије во спротивставувањето на заканите за нејзината национална безбедност, според меморандумот. За таа цел, Хелсинки и Стокхолм нема да даваат поддршка на терористичката група ПКК/ЈПГ или на Фетулахистичката терористичка организација (ФЕТО), групата која стои зад поразениот пуч во Туркије во 2016 година.
Во својата повеќе од 35-годишна терористичка кампања против Туркије, ПКК – на листата на терористички организации од Туркије, САД и ЕУ – е одговорна за смртта на повеќе од 40.000 луѓе, вклучувајќи жени, деца и доенчиња. ЈПГ е нејзин сириски огранок.
Турските власти, вклучително и претседателот Реџеп Тајип Ердоган, предупредија дека Туркије нема да даде знак за членството на Шведска и Финска додека не се имплементира меморандумот.
Потребна е едногласна согласност од сите 30 постоечки сојузнички земји за една земја да се приклучи на НАТО.
