НАТО се приклучи на повиците за хуманитарна пауза во конфликтот Израел-Хамас за да се дозволи критична хуманитарна помош да влезе во Газа.
Генералниот секретар на Алијансата Јенс Столтенберг денеска изјави дека ги поддржуваат дипломатските напори за хуманитарен прекин на огнот.
„Меѓународното право мора да се почитува, цивилите мора да бидат заштитени, а сојузниците на НАТО поддржуваат хуманитарна пауза за да се дозволи помошта да стигне до Газа. Страдањето што го видовме во последните недели не потсетува уште еднаш дека не смееме да се откажеме од работата за трајно, мирно, политичко решение“, рече Столтенберг во Берлин пред билатералната средба со канцеларот Олаф Шолц.
Тој, исто така, ги предупреди регионалните актери да не преземаат чекори кои би можеле да предизвикаат поширок конфликт на Блискиот Исток.
„Војната во Газа не смее да се претвори во голем регионален конфликт, Иран и Хезболах мора да останат надвор од оваа борба“, нагласи Столтенберг.
Израел започна немилосрдни воздушни и копнени напади врз Појасот Газа по прекуграничниот напад на Хамас на 7 октомври.
Оттогаш се убиени најмалку 10.569 Палестинци, меѓу кои 4.324 деца и 2.823 жени. Во меѓувреме, бројот на загинати во Израел е речиси 1.600, според официјалните бројки.
Покрај големиот број жртви, масовните раселувања и илјадниците згради срамнети со земја, основните резерви се при крај за 2,3 милиони жители на Газа поради израелската опсада.
