Светската здравствена организација (СЗО) објави дека Израел намерно го уништил здравствениот систем во северниот дел на Газа за време на интензивните напади и опсада.
„Видовме систематско демонтирање на здравствениот систем во северниот дел на Газа. Тој беше под опсада 80 дена, со што животот на околу 75.000 Палестинци кои останаа во областа се изложени на голем ризик“, изјави за Анадолу портпаролката на СЗО, Маргарет Харис.
Нагласувајќи ги алармантните услови, таа посочи дека последната голема медицинска установа во северниот дел на Газа, болницата „Кемал Адван“ сега не е во функција.
Според неа, и во другите делови на Газа луѓето се борат со проблемите на несоодветните засолништа и недостатокот на храна, што го отежнува пристапот до медицинска нега.
Харис додаде дека други болници во Газа се исто така нападнати, истакнувајќи дека неодамна биле погодени две болнички установи во центарот на Газа, што ја влошува ситуацијата уште повеќе.
Ако бомбите не ги убијат, болеста и сиромаштијата ќе ги убијат
Маргарет Харис жали за трагичните извештаи за деца кои умираат од студ во Газа, опишувајќи ја ситуацијата како „неподносливо тажна“.
„Ова е најсуровото нешто што можете да им го направите на родителите кои не можат да ги обезбедат најосновните работи за своето дете и да гледаат како нивните малечки умираат. Рековме пред една година; го предвидовме ова затоа што луѓето беа принудени да ги напуштат своите домови и не беа дадено соодветно засолниште и услуги“, изјави Харис.
Таа истакна дека „ако бомбите не ги убијат, болестите и сиромаштијата ќе ги убијат...“
„Не можев да верувам дека тоа навистина ќе се случи“, рече Харис.
Болница „Камал Адван“
Таа потврди дека болницата „Кемал Адван“ е празна, а пациентите во критична состојба се префрлени во Индонезиската болница, која исто така мака мачи поради недостиг на основна опрема и потрошен материјал.
Зборувајќи за директорот на болницата, Хусами Абу Сафије, кој беше приведен од израелските власти, Харис рече дека немаат информации за неговиот статус.
„Реалноста е дека во моментов нема вистинска здравствена заштита за луѓето во северниот дел на Газа“, заклучи Харис.
Израел уби повеќе од 45.500 Палестинци во Газа од 7 октомври 2023 година и ја претвори енклавата во урнатини.
Во ноември, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со обвинение за геноцид пред Меѓународниот суд на правдата поради војната во Газа.
