ТикТок почна да ја обновува својата услуга во неделата, помалку од еден ден откако сопственикот БајтДенс (ByteDance) ја затвори апликацијата за споделување видеа во САД, откако стапи на сила федералната забрана.
„Во договор со нашите даватели на услуги, ТикТок е во процес на обновување на услугата“, објави ТикТок во неделата попладне на X.
Во соопштението, исто така, компанијата му се заблагодарува на новоизбраниот американски претседател Доналд Трамп, кој рече дека размислува да му даде продолжување на ТикТок бидејќи се шират извештаи за потенцијалните понудувачи.
„Му благодариме на претседателот Трамп што им ја даде потребната јасност и уверување на нашите даватели на услуги дека нема да се соочат со казни со обезбедување на ТикТок на над 170 милиони Американци и дозволувајќи им на над 7 милиони мали бизниси да напредуваат.
„Тоа е силен став за Првиот амандман и против произволната цензура. Ќе работиме со претседателот Трамп на долгорочно решение што ќе го задржи ТикТок во САД“, се додава.
Претходно, многу корисници пријавија дека виделе порака која навестувала решение подоцна во текот на денот.
„Извинете, ТикТок не е достапен во моментов. Во САД е донесен закон за забрана на ТикТок. За жал, тоа значи дека засега не можете да го користите ТикТок“, се вели во првичната порака на апликацијата.
„Ние сме среќни што претседателот Трамп посочи дека ќе работи со нас на решение за враќање на ТикТок откако ќе ја преземе функцијата“.
Неколку часа подоцна, оптимизмот се појави кога некои корисници беа пречекани со нова порака по отворањето на апликацијата: „Добре дојдовте назад“.
Во ажурираната порака од TикТок се вели: „Ви благодариме за вашето трпение и поддршка. Како резултат на напорите на претседателот Трамп, ТикТок се врати во САД! Може да продолжите да создавате, споделувате и откривате сите работи што ги сакате на ТикТок“.
TикТок претходно истиот ден најави дека ќе ги направи своите услуги „привремено недостапни“ поради федералната забрана.
Законот, потпишан минатиот април, бараше кинеската матична компанија на ТикТок, БајтДенс, да се откаже од апликацијата во рок од 270 дена или ќе се соочи со забрана.
Судот пресуди дека ултиматумот за продажба или забрана не ги нарушува правата на компанијата од Првиот амандман во Уставот на САД.
Белата куќа соопшти дека кинеската апликација за социјални медиуми треба да остане достапна во САД, но под американска сопственост за да се решат грижите за националната безбедност.
Иако Врховниот суд на САД го потврди законот во петокот, Трамп вети дека ќе интервенира во понеделник, кога ќе стапи на функција ќе издаде извршна наредба за одложување на спроведувањето на законот и да работи на решение.
„Би сакал Соединетите Американски Држави да имаат 50% сопственичка позиција во заедничко вложување. Со тоа го спасуваме ТикТок, го чуваме во добри раце и му дозволуваме да остане во функција. Без одобрение од САД, нема ТикТок. Со наше одобрение, вреди стотици милијарди долари - можеби трилиони“.
Извршниот директор на ТикТок, Шоу Зи Чу, се очекува да присуствува на инаугурацијата на Трамп.
