Новоизбраниот претседател на САД, Доналд Трамп, денес вети дека ќе реши огромен број кризи на Блискиот Исток, во екот на израелската војна во Појасот Газа, историските настани во Сирија и кревкиот прекин на огнот меѓу Хезболах и Израел во Либан.
„Додека зборуваме, работите се случуваат многу продуктивно на Блискиот Исток. Мислам дека Блискиот Исток ќе се реши. Мислам дека е покомплициран од руско-украинскиот, но тоа е полесно да се реши“, изјави Трамп за магазинот „Тајм“, кој го избра за Личност на годината.
Трамп одби да елаборира за тоа кои случувања на Блискиот Исток ги смета за продуктивни и не го поддржа решението на две држави за ставање крај на израелско-палестинскиот конфликт, вклучително и контроверзниот план што тој го изнесе за време на неговиот прв мандат.
„Го поддржувам секое решение што можеме да го направиме за да постигнеме мир. Постојат и други идеи освен две држави, но поддржувам сѐ што е неопходно за да се постигне траен мир“, рече Трамп.
Републиканецот, на прашањето дали му верува на израелскиот премиер Бенјамин Нетанјаху, рече дека „не му верува на никого“, но од друга страна, истакна дека верува оти Нетанјаху е „сигурен дека Трамп ќе успее да стави крај на војната“.
Трамп, исто така, не негираше дека постои можност САД да му дозволат на Израел да го анектира окупираниот Западен Брег, наведувајќи дека „само сака договор што ќе го запре убиството“.
Трамп истакна дека ако тој беше претседател кога започна конфликтот во 2022 година, војната во Украина немаше да се случи.
Тoj рече дека би сакал брзо да ја запре војната во Украина, која трае речиси три години и дека не се откажува од поддршката за Украина и оти сака долгорочен мир. Трамп изјави дека има „многу добар план“, но дека би бил „речиси безвреден“ доколку го открие сега. Тој исто така рече дека бројот на луѓе кои умираат во војна не е одржлив. Зборувам за двете страни. „Навистина е победа-победа за двете страни да го завршат тоа“, рече тој.
„Не можете да постигнете договор ако ја напуштите Украина. Верувам дека оваа воена состојба треба да заврши што е можно поскоро, бидејќи бројот на загинатите, и Русите и Украинците, е страшен“, изјави Трамп за американскиот магазин, кој го избра за Личност на годината.
Тој силно ја критикуваше дозволата за употреба на американски ракети со долг дострел за цели на територијата на Русија, нагласувајќи дека тоа е голема грешка што само ја влошува војната и севкупната ситуација.
