Американскиот претседател Доналд Трамп изјави дека планира денеска да објави царини од 25 отсто за целиот увоз на челик и алуминиум во САД.
Тој наведе дека овие даноци ќе важат за „секој челик и алуминиум што ќе влезе во САД“ и додаде дека ќе објави „реципрочни царини“ за одредени земји во вторник или среда, кои ќе стапат на сила речиси веднаш по објавувањето.
„Многу едноставно, ако ни наплатат, ние им наплаќаме“, им рече Трамп на новинарите кои патуваа со него vo „Ер Форс 1“ до Супербоулот.
Трамп не прецизираше кои земји ќе бидат цел, но рече дека тоа нема да има големо влијание врз земјите кои веќе имаат „слични царини“ како САД.
„За оние кои ќе ги искористат предностите на Соединетите Американски Држави, ќе имаме реципрочни царини“, рече тој.
Како што истакна, „секој челик што ќе влезе во САД ќе подлежи на царина од 25 проценти“, така што „сите“ ќе бидат покриени со царините.
Канада и Мексико се двата најголеми трговски партнери на САД кога станува збор за челик, а Канада е најголемиот снабдувач со алуминиум, така да најмногу ќе биде погодена од новите мерки.
За време на неговиот прв мандат, Трамп воведе царини од 25 отсто за увоз на челик и 10 отсто за увоз на алуминиум од Канада, Мексико и ЕУ, но една година подоцна беше постигнат договор со Канада и Мексико за укинување на овие тарифи, додека даноците за увоз од ЕУ останаа на сила до 2021 година.
