Американскиот претседател Доналд Трамп, кој денеска положи заклетва како 47. Претседател на САД изјави дека американската држава повеќе нема да се бори против политичките противници.
„Знам нешто за тоа. Тоа никогаш повеќе нема да се случи. Ќе воведеме ред и закон во нашите градови. Оваа недела ќе ги стопирам мерките со кои прашањата за полот и расата се вплеткуваат во секоја пора на општеството. Ќе се бориме за општество кое не гледа боја на кожа, а кое ќе се заснова на заслуги. Ќе имаме два пола-машки и женски“, рече Трамп за време на неговиот говор за време на церемонијата на инаугурација во Капитол.
Тој нагласи дека силата на американската војска ќе се мери не само по победите што ги постигнува, туку и по тоа колку војни завршува и во колку војни не учествува.
„Нашите вооружени сили ќе бидат фокусирани на нивната единствена мисија, да ги поразат американските непријатели“, рече Трамп.
Тој нагласи дека сака да биде запаметен како „миротворец и обединувач“ и додаде дека во Америка ќе се врати националното единство.
„Националното единство сега се враќа во Америка, а довербата и гордоста се зголемуваат како никогаш досега. Во сè што правиме, мојата администрација ќе биде инспирирана од силната желба за извонредност и континуиран успех. Нема да ја заборавиме нашата земја, нема да заборавиме нашиот Устав и нема да го заборавиме нашиот Бог“, рече Трамп.
„За краток период Мексиканскиот Залив ќе се преименува во Американски Залив“, Трамп го повтори ветувањето што го даде неколку дена пред неговата инаугурација за претседател.
Тој рече дека САД ќе го следат „Манифестот судбина“ до ѕвездите и дека ќе ги лансираат американски астронаути да постават „ѕвезди и ленти на Марс“.
