Република Туркије го осуди вчерашното илегално влегување на израелскиот министер за национална безбедност, екстремниот десничар Итамар Бен-Гвир во џамијата Ал Акса во окупираниот Источен Ерусалим.
„Најостро го осудуваме илегалниот влез што го изврши израелскиот министер под заштита на безбедносните сили. Покрај актуелниот геноцид во Газа, провокациите на израелските власти насочени кон промена на историскиот статус кво во џамијата Ал Акса претставуваат закана за безбедноста и стабилноста во регионот“, се вели во соопштението на турското Министерство за надворешни работи.
Туркије во оваа прилика ја повика и меѓународната заедница да ги преземе неопходните мерки против постапките на израелските власти, кои дополнително ги зголемуваат тензиите во регионот.
Одделот за исламски донации во Ерусалим, кој е под управа на Јордан, изјави дека Бен Гвир го посетил дворот на џамијата под силна полициска заштита. Тоа е негов петти упад во комплексот откако стана министер во 2022 година.
Провокацијата се совпаѓа со еврејскиот празник Ханука, кој започна во четвртокот и трае една недела.
Арапската партија на Израел, Националната демократска алијанса, го осуди потегот на Бен-Гвир како „намерна провокација на чувствата на Арапите и муслиманите ширум светот“. Тие ги повикаа Палестинците да го зголемат присуството и посетите на џамијата.
По Мека и Медина, џамијата Ал Акса е третото најсвето место во светот за муслиманите. Евреите го нарекуваат комплексот на џамијата Ал Акса „Ридот на храмовите“.
Израел го окупираше Источен Ерусалим за време на арапско-израелската војна во 1967 година. Тој го анектираше целиот град во 1980 година во потег што никогаш не беше признат од меѓународната заедница.
