Властите на Република Туркије денеска предупредија дека неодамнешните напади врз турски државјани во Белгија уште еднаш потврдија дека терористичката група ПКК е закана за општествениот мир и јавниот ред во Западна Европа.
Министерството за надворешни работи на Туркије соопшти дека членови на терористичката организација ПКК во неделата се собрале во белгискиот град Лувен и нападнале турски државјани кои живеат во градовите Хеусден-Золдер и Хаутхален.
Повредени се неколку турски државјани.
„Како одговор на овие настани, веднаш беа контактирани белгиските власти во Брисел и Анкара“, се наведува во соопштението.
Турскиот министер за надворешни работи Хакан Фидан истата вечер разговараше со својот белгиски колега Хаџа Лахбиб, а дипломатски претставници на Туркије во Белгија се сретнаа со граѓаните на нивната земја во градовите каде што се случија инцидентите.
„Благодарение на здравиот разум на нашите граѓани кои живеат во Белгија и ефикасната интервенција на белгиските безбедносни власти, спречена е ескалација на инцидентите“, се наведува во соопштението од Анкара.
Белгиските локални власти започнаа истрага за овие инциденти.
ПКК е сепаратистичко-терористичка организација која се наоѓа на листата на терористички групи во Туркије, ЕУ и САД. За време на повеќедецениската терористичка кампања против Туркије, терористите на ПКК убија најмалку 40.000 луѓе.
Туркије силно ја осудува толеранцијата кон терористичката група ПКК и нејзините поддржувачи во Европа.
