Високата европска парламентарка уапсена на почетокот на месецот во корупциски скандал даде барем делумно признание пред судијата, објавија дневните весници кои го покриваат развојот на настаните за случајот.
Според италијанскиот дневен весник „Ла Република“ и белгискиот „Ле Соар“, грчката европратеничка Ева Каили му рекла на судијата во Брисел: „Тоа е вистина. Знаев за активностите на господин [Антонио] Панцери“, мислејќи на долгогодишниот европратеник кој е во центарот на истрагата за корупција. „Знаев за куферите со пари во мојата куќа“, се наведува дека рекла во врска со торбите полни со готовина пронајдени во нејзиниот дом кога беше уапсена.
Но, дневните весници објавија дека Каили само го признала она што инспекторите одамна го знаеја. Се истакнува дека таа го предупредила нејзиниот татко за претресите и му рекла да ги изнесе парите; тој е уапсен речиси во исто време кога и таа, со вреќа полна со пари во рака.
Се наведува дека Каили ги предупредила Панцери и уште двајца пратеници. Во врска со скандалот пронајдени се вкупно 1,5 милиони евра во готовина. Каили е осомничена дека е платена од Катар да лобира за интересите на заливската земја. Таа останува во притвор во Белгија.
Каили (44), инаку членка на грчката централно-левичарска партија ПАСОК-КИНАЛ и една од 14-те потпретседатели на Европскиот парламент, беше уапсена на 9 декември од белгиската полиција, откако нејзиниот дом беше претресен поради обвиненија за корупција поврзани со Катар.
Минатиот вторник ѝ беше одземена функцијата потпретседател на Парламентот.
Поради вестите за скандалот, парламентарците на ЕУ во четвртокот со големо мнозинство гласаа за суспендирање на привилегиите за пристап за катарските лобисти во периодот на траење на истрагата. Конечната одлука по ова прашање ја има Роберта Мецола, претседателката на ЕП.
Мецола вчера за германската медиумска група Функе изјави дека има „јасна порака за сите злонамерни актери од трети земји кои веруваат дека можат да постигнат нешто со пари. Европскиот парламент ќе им застане на патот“, додаде таа.
Катар ги отфрли обвинувањата како „неосновани и сериозни дезинформации“ категорично отфрлајќи ги сите обиди за негово поврзување со обвинувања за недолично однесување.
