Организацијата Репортери без граници објави дека израелската армија е одговорна за секоја трета смрт на новинари ширум светот оваа година.
Репортери без граници објавија извештај за состојбата на новинарите ширум светот за 2024 година.
Во извештајот се наведува дека во 2024 година во светот биле приведени 550 новинари, 55 биле затворени, а 95 се водат за исчезнати.
Годинава ширум светот се убиени 54 новинари, што е најголем број во последните пет години. Повеќето од новинарите биле убиени во конфликтни опкружувања.
Годинава секој трет новинар ширум светот е убиен од страна на Израел. Од нив 16 се убиени во Газа, а двајца во Либан.
Иако бројот на убиени новинари во Газа од октомври 2023 година надмина 145, најмалку 35 од нив биле цел на израелската војска или се убиени додека биле на должност.
Од Репортери без граници информираат дека имаат докази дека десетици новинари во Газа и во Либан биле цел на израелската армија поради нивната работа.
Оваа организација досега поднела четири жалби до Меѓународниот кривичен суд (МКС) во кои се тврди дека израелската армија извршила воени злосторства врз новинари.
Израел годинава стана трет најголем затвор за новинари.
„Повеќето од овие новинари можеа да бидат идентификувани и заштитени поради нивниот статус, но тие беа убиени во израелски напади, кои намерно ги игнорираа меѓународните договори“, рече генералниот директор на Репортери без граници, Тибо Брутин.
Брутин истакна дека на странските весници им е забранет влез во Појасот Газа, кој е цел на израелски напади.
„Газа стана најопасниот регион за новинарите во 2024 година. Дури и новинарството тука е под закана од исчезнување“, додаде Брутин.
